FraueTag, 8. März
därf mär überhaupt no frau säge?
und wer isch eigentli dä ständig zitierti mär?
zur feier des tages bini hüt ohni bh gsi, #donotwearaslip hät gsellschaft übercho.
ich ha hüt bsunders a zwei fraue dänkt.
di einti isch mini grosstante. sie isch im türlersee vertrunke. als jungi frau. sie seig e gueti schwümmerin gsi. isch allnä es rätsel, wie das hät chöne passiere. ich ha immer wieder nagfrägt und gnauers welle wüsse. aber schiints seig nöd wiiter drüber gredt wordä. das isch lang gsi bevor ich ufd welt cho bin. min grosätti hani nie zu däm chöne befräge, damals het die gschicht gar nöd existiert. klar, so öpis wetsch lieber vergässe, wenn dini schwöster unerklärlicherwiis vertrinkt. wie traumatisch. mis grosi hät nöd villmeh gwüsst, sie hani vor wenige jahr no chöne dezue fräge. sie isch es paar dörfer wiiter ufgwachse und es isch verzellt wordä, was ame maitli vo aeugst passiert seig.
drum häts grosi au nöd därfe schwümme lerne.
vill z gfärlich. oder villicht eifach, will sie es maitli isch? ämel hät sie fürs gliiche schaffe wie ihre brüetsch kei geld übercho im vergliich zu ihm. was mis grosi statt schwümme aber früeh glernt het vo ihrer muetter isch gsi: “schwanger musch gar nie heicho, susch chasch grad in see”. sie hät dänn bis sie ghürate gsi isch au uf kein fall meh welle als händlihebä, zu gross isch d angscht vorere ungwollte schwangerschaft gsi.
wo ihre brüeder später unehelich s emmi gschwängeret hät, isch mis grosi scho uf aeugst ghürate gsi. sie isch mitem velo zu ihrem brüeder gfahre, dä isch grad am mälche gsi, und hätem im stall d levite gläse. “gopfried, jetzt wird ghürate” “nei ich wott nöd, die söll in see”.
s chind us däre gschicht isch dänn s gotti vo minere jüngste schwöster wordä, also happy end, es trochnigs. hm… und dänn fräg ich mich, was isch ächt mit minere grosstante, wo eifach gschwiige worde isch drüber, ächt passiert, dass sie bime schwumm im türli nachem heuä amä warme summertag im see vertrinkt. es wird vermuetet, sie heg villicht en plötzliche chrampf gha im bei. dänn wirds sofort wieder still. känsch ja di erwachsnä.
und di ander frau wo mir hüt bsunders näch isch, isch d tina.
läck hämmir zämme gsoffe, graucht, glacht, brüelt und gvöglet (aso das eher separat - und böck, aber natürli au mal drüer und so, anderi story, andersmal) di wildischtä gschichtä zäme erläbt. ebbe und fluet. und ebä au gfluecht.
am mittwuch morge hani dä briefchastä gläärt und ein längliche brief isch ungwöhnlich dicker gsi, das isch dä einzig woni ufgmacht han. det drin: d todesaazeig vode tina. en moment wo alles gliichzitig isch und nüt. so vill bilder und emotione. unvorstellbar aber ihri empfindige, wo sie dezuebracht händ für en würdevolle abgang bi exit kämpfe. “yesss, tinaaaa, du hesches gschafft”, säg ich luut und brüelend i di leer stube use.
ich magmi guet an moment erinnere, wo sie mir ihre erlösigswunsch aavertraut hät. sehr vorsichtig, will angst vor unverständnis. es isch nöd ganz eifach usem läbe zga, wänn du dich nöd mit überdosis vo starche substanze uskännsch und au nöd wotsch vordä zug springä oder eifach susch en halbpatzige versuech starte. bi exit hät sie sich verstande gfühlt, dennoch bruchsch du zum freiwillig sterbä es guetachte vo dim doktor. wänn dä s gfühl hät, du müssisch no s neustä medikament usprobiere, dänn musch dich sediere laa und wiiter vor dich hii vegetiere.
dä hippokratisch eid verursacht offesichtlich vill leid. https://de.wikipedia.org/wiki/EiddesHippokrates
zum biispiel au, wenns um en underbindigswunsch vo under 30jährige fraue gaht, isch bevormundig adä tagesordnig. (<—klick, da hets e episode dezue)
für dich tina, du geili schnalle!
