Füür und Pfanne
Füürchochä yes, dä bewirbimi umen Job.
Jedä Tag nach Füür schmöckä, das isch dääää Traum!
Hanimi voll beworbä, hetti nie dänkt vo mir, bi sit 15 Jahr mini eigni Bossin.
Enthusiastisch hani gschriibä, zrugcho isch e lauwarmi Standardantwort mit Wunsch nacheme CV.
Da bini tifig verwacht, für so öpis bini nöd gmacht.
Du nei dankä, da reutmi mini Läbesziit dänn zfescht.
Husch use in Garte und agfüüred mitem imaginäre CV.
(Dä CV, jetzt forever dä RunningGäg)
En CV also.
Das isch halt so, seisch du?
Und wunderisch dich über de Zuestand vo Wirtschaft und Gsellschaft.
En CV also.
Lieber d Vergangeheit bestuunä statt s Jetzt erkänne und tatkräftig Zuekunft erschaffä.
En CV also.
E tabellarischi Uflistig vo alter Suppä isch dir lieber als s pulsiere zwüsche de Ziilä zgspürä.
Ahaaa määär häts immer so gmacht… Wie wotsch dänn susch... Ja gäll määär muess halt…
Ja adémässi.
(That's not my Style)
Dussä Summerräge.
Dinnä Füür.
Chuchi putzä.
Stephen Hawking losä.
Peperonis beflamme.
Hackfleisch und Peterli zämechnäte.
Was füres Glück.
(Shit, woisch min CV wo mich befähigt en Hackspiess zmache)
Ah genau, dä Typ womi so abgfüllt hät... Vo wäge Peperoni.
Ha gseit ich wott nümm, aber bi so jung und aständig gsi, ha s ufgfüllte Rosé Glas immer wieder brav ustrunke.
Und woner über mir gsi isch uf sim Bett, bini dänn z bsoffe gsi zum mich wehrä.
Und ebä genau dä Typ, hättmir zeigt, wiemer dä spezielli Peperoni Salat macht.
Das isch no vorem vilä Rosé gsi und hätmi sehr fasziniert.
Hani letscht Friitig s erschtmal zuebereitet und isch sehr köstlich gsi.
Überem Füür i miner Chuchi währendem Gwitterräge verussä.
(Du grusigä Siech, s Rezept isch dä Hit)
Das isch d Gschicht vom Rape Salade.
und für all diä wo täfered sind:
cv isch nur en stellverträter für sinnlos alti strukture wo ihre zweck mal erfüllt händ und ich de sinn und zweck sehr wohl au gse, aber mir mit altem shit nur ufde stell träted.
und natürli weissi nach 15 jahr selbständigkeit wüki nöd, wie de momentani stand vode bewerbigs layout isch, aber weri cha fräge weissi gnau und so wie ich mir viles sälber biibracht han, hetti au da recherchiert und das zämegstieflet. aber es hät sooo sinnlos gwürkt, ufzlischtä, i wellnä catering, kafis, bars, hamam etc ich vor 15 jahr gschaffet han, will wo schriibi dänn hii, was di vergangnä 15 jahr beinhaltet händ? määär nännts; projektleitig, events plane und durefüere, IT crowd… blablabla.
da chuntmer in sinn, letscht jahr hani mal bim ufrumä einigi usbildigsdiplöms und so ufglistet, ja au mir gaht bim uflistä mängisch einä ab, lug da.
und natürli wünschi minä nöd zuekünftige arbeitgeber s bescht und dankä fürd inspiration, gse wieder klar, wasi mir sälber erschaffä han, bi extremst glücklich dämit und füürchochä i mim huus und i mim gartä so vill und frei wieni wott.
